الشاعرة السورية أمل فرج

في باقة من القصائد بالمحكية

-×-×-×-

_1_

تسلل على لحاف الغفا خَلّي
ظِلّك يحاكي بالعتم ظِلّي
من نور وجهك بقشعك لا تخاف
شو حاجتو البردان بعد لحاف
وشو حاجتو المحزون لَلِّكتاف
مادام حبك لفني كلي

_2_

عيونك جزيرة واقعة بالمي
قلبي تركني وتاه فيها خطي
عامطرحو الفاضي مابدو يعود
ياريت علقتو بعيون السود
تاكان يرجعلي بعد بشوي
مفقود قلبي والجسم موجود
وعالموت محسوبي وقلبي حي

_3_

لما بليالي البرد بتشتي
وجدي يكنكن حد وهج النار
شو كان يضحك سنها ستي
لما يغنجها يا ورد الدار
هاتي الربابي وجهزي المتي
انتي اشربي وعندي انا الاشعار
وتكون لسطيحة بلا مهتي
تدلف عليهن متل ما ع الجار
ومرتاح بالن والعشا فتي
خبز ودبس بالصحن عالمقدار
يقلا اضحكي وهم الدني زتي
غير الفرح ماطول الاعمار
وتا تضيفيني خبرتك كتي
بصحن الحكي..جوعان هالختيار

لشاعرة أمل فرج