-1-

نامي يا مَيمتي
ع زندي
ما تخافي
هيدا مش صوت
الرّعد ب تْشارين
هيدا نعيب البوم
بفصل العنف
ب كْوانين
بيهرّ الورد
بيسرق الوعد
بيخطف الحلوين

نامي يا ميمتي
ع زند إمّك
خلّيها بقلبها
تشمِّك
وبروحها تضمّك
وتمسح دمعها
بكمّك
يا بُرعُم الطّهر
يا عطر الياسمين

قومي يا ميمتي
تغندري
تا أوضع عَراسِك
الطّرحة
وشوف بعيونك
الفرحة
متوّجِة صِباكِ
مكلِّلِة الْجبين

نامي يا مَيمتي
ع زندي أنا
وصيري احلمي
بوطن أرزُه ما
انحنى
وع طول شامخ
بالسَّنا
ع جبل صنّين

نامي يا ميمتي
يا شمعة بِبَيتي
يا حلم شَيْبتي
وما تنسي
ع وصلْتِك
تخبّري الله
أنّو ثقافة العنف
بالشّعب عم
تتسلّى
وتقدّموا قرابين
لأنّها ما بتعرفَك
تخمين
ومعوّدة بالظلّ
تعبد شياطين.

-2-

عايدة قزحيا

— كفكفي دمعتك يا امّي

ما بقا تبكي

— شو نسِيتْ خيَّكْ الْ مات!

ليش هيك عم تحكي؟!

—يا امّي خيّي مَيِّت

من سنين

من وقت اللي

انعجْنِتْ دمعتو

بكمشة طحين

— بس اليوم مات

من عيوني

وبسلاح الإهمال

بقلبي صابوني

—يا امّي خيّي

ع صخرة الرّوشة

انحفر اسمو

بالفلا

قومي اركعي

يا امّي

ما بينفعوا غير

الصّلا

—يا ابني الباقيلي بهالدني

ما تزيد همّي

خيّك ال راح

أخد منّي

بسمتي ال ع تمّي

— يا امّي لو بتعرفي

قديش ع الموت

عم بحسدو

ولولا جبرة

خاطرك

كنت الموت

متلو بنشدو

نحنا يا امّي عم

نزرع أمل وجهود

وهنّي أحلامنا

بجهلهم

عم يحصدوا

— لا.. لا يا ابني

ما تيأس من

هالدّني

ولا تسمح لراسك

قدّام الباطل

ينحني

دموعي يا ابني

رح تطّهّر الأرض

بملحها

وأنت خليك بصمودك

داوي جرحها

الوطن الْ عندو

قلب متل بيروت

نبضو ما بيوقف

وشعبو مش ممكن

يموت

-3-

— آلو.. آلو
يا ابني وينك بعدني ناطرة ع الغدا قلتلّي أنّك جايي عالطريق؟
— تغدّي يا امّي وما تنطريني أنا رحت بمهمّة بدّي طفّي حريق
— آلو.. آلو.. آلو
وين صرت يا ابني ليش ما عم تردّ عليّي؟
بعدك عم تطّفّي الحريق يا نور عينيّي؟
وينك يا ابني
خطّك مسكّر؟
عم تطّفّي نار الانفجار؟!
والنّار بقلب أمّك مين بيطفّيها؟
دموع عمري كلّه يا ابني
ما بتكفيها.

#( الكاتبة عايدة قزحيّا/ لبنان )