طفلة .. ع خدّ النار
شو ذنبي إخلق بهالميل
مش هالميل ياربّي؟!!!
شو ذنبي عيش تحت الحرب
قصف وضرب
خوف ..ورعب
أنا يا ربّ شو ذنبي؟!!!
أنا شو عملت
ما في غير
غنج وحبّ بيقلبي؟؟!
بحبّ الكلّ
بدّي ضلّ
إلعب..ما كذبت كذبه
يا ربي ليش يا ربّي
ما عاد لي بيت
صار البيت
تحت النار.. والشحتار
شقع حجار
تحتن في إلي لعبه
اشتقت كتير..للّعبه!!!
ولك ياريت
يا ربي
منبقى زغار
ليل نهار
نطّ ولعب بمحبه
نضلّ زغار
لعب الكبار
كلّو نار
قهر دموع
خوف وجوع
قلي بس يا ربي
أنا ما بسبّ
أنا اللي بحبّ
قلي بس شو ذنبي؟
وما في غير حب بيقلبي؟؟؟
يا ربي وين وديتن
اللي حبّوني ..وحبّيتن ؟!
كانو كتار
حولي كتار
وبيتي كان متل بيتن
ما بعرف وين
راحو لوين
يا ربي نهار
بس نهار
أخّر وقت غفّيتن
يا ربي كتير
لا شفتن عدت
لا نسَيتن
بكيت كتير
يا ربي كتير
أخدتن لَي
ما ردّيتن؟!!!
يا ربي الحرب شو قاسي!!
وأنا زهره ع حفّة مَيّ
لا منشمّي ..ولا منباسي
وفراشة زغيّرة بالفيّ
شو ذنبي؟؟.. قول شو ذنبي!!
وقلّي ليّ؟
زرعت الحبّ…فرّخ نار
ع لوني عربش الشحتار
بصوتي الخوف من شو صار
بعيني دموع
ما في دموع
حتى تساع ياللي صار
لوين بروح يا ربّي؟!!!
وببكي لمين يا ربّي؟!
وأنا طفله ..ما بعرف غير
كل الحب بيقلبي
صار الخوف بيقلبي
وبعيني دموع..يا ربّي
لعب الكبار..كلّو نار
كذب هالصار
كل الصار
وما بدّي صدّق الكذبه !!!
زياد عقيقي
الشاعر زياد عقيقي
