أبيات بالمحكية من جبل الشيخ

للشاعرة يسرى برجاس

-×-×-×-×-×

كانون ما أقساك لما تعود
كلك برد ثلج وشتي ورعود
خليت قلبي يكون يا كانون
متلك بنفس العاصفه موعود
شباط أصغر شهر بالأيام
قلاب طبعو صغير مابينلام
اوقات بكون بهنا وسلام
وساعات عاطبعو الغضب بيسود
أذار شو مخبي يا أذار
طولت أيامك وثلجك الذرذار
متل العطر كفيت هالمشوار تاهديت لنيسان مرج من الورود
نيسان لما بالزهر أقبل
محمل بعطر الكون ومدلل
كل نسمه فيه عم تسأل
عن حب باقي بالأمل موجود
أيار ثوب المخمل الوردي
لبستو أنا وماحدا قدي
حزيران لون بحمرتو خدي
تموز وسع بجمالي حدود
أب خلا الجمال متل سكر ذاب
كثر حلاوه والعنب قد طاب
ولع حنايا العاطفه اللهاب
أيلول نزل الدمع عالخدود
تشرين عالأيام وعاني
وقلي بهداوي هالعمر فاني
بلفته على تشرينا الثاني
صارت الحكمه عالشباب تسوود
خليت قلبي يكون يا كانون
متلك بنفس العاصفه موعود