# الشاعر اللبناني الدكتور إبراهيم شحرور . كتب قصيدة على نمطه الطريف والهادف , وذلك بعد أن علم بأن الرئيس الفرنسي إيمانويل ماكرون قرر إن يستهل زيارته إلى لبنان بزيارة سفيرة النجوم السيدة فيروز وارتشاف القهوة معها وذلك مساء الإثنين في 1 / 9 / 2020 …هنا قصيدة الشاعر شحرور :
” كنّا وكانو هالبنات مجمّعين
يمّي وما بعرف ليش نقّاني أنا “
نحنا منعرف ليش نقّاكي يا فيروز :
لأنّك القمر الوحيد للغيمِه الحزينِه
لْ راجعه بأيلول …
لأنّك إسوارة العروس …
والمزهريّه لْ ما كنّا نداريها ولا نعتني فيها
تا ضاعت الهديّه …
بكرا بسّ تشوفيه احكيلو :
عن بيروت
عن مينا الحبايب
ومنارة اللي ضايع
وزهرة الياقوت …
عن بيوت الجمّيْزه وأهلا
عن الورد اللي مايل عا غيابن
عن ورد العتب المايل
عن اللي تركو الرسايل على بابن
وانكتبو بالرسايل …
قوليلو :
بلدي صارت منفى
طرقاتي غطّاها الشوك
والأعشاب البرّيه
بْعَتلي بهالليل
من عندَك حدا
يطلّ عليّي …
قوليلو :
بعدو القمر بيضوّي عالناس
والناس بيتقاتلو …
وقبل ما يفلّ ما تنسي تقوليلو :
بتتلج الدني
بتشمّس الدني
ويا لبنان بحبّك
تا … تخلص الدني …
