كتب الشاعر اللبناني ابراهيم شحرور فصيدة جديدة حملت عنوان ” ” بحر بحور ” وقال فيها :
“””””””””
في بحر للصيّاد
ليل نْهار
بْيرمي الشبك
ويْعدّ سمكاتو ….
وْفي بحر
شمسو للمرا زنّار
وْتكرج عَ جسما
عيون موجاتو …
وْفي بحر
خلف البحر
للبحّار
تارك بإيد الريح
مرساتو …
وْفي بحر للغرقان
شطّو صار
حلم اللي ماتو
قبل ما ماتو …
كلما رحت مشوار
عم بحتار
هالبحر
شو في بْحور
جوّاتو …
يمكن أنا بْقلبي
قلوب كتار
كلْ قلب
بسمع شِكل
دقّاتو
وْما في وَلا مرّه
رحت مشوار
عالبحر ذاتو
بالقلب ذاتو …
“”””””””””””””
-2-
وكان الشاعر شحرور قد كتب قصيدة ” جنازة عصفور ” وقال فيها :
“”””””””””””””
كلُّن إجو
عَ جْنازةِ العصفور :
الشجره إجِت
عَ كْتافها منديل فَيّ
وْحطِّت عَ قبرو غصنها المكسور …
والنهر
تَ يْخبّي دموعو شْوَيّ
عَ الدفن جايي
وْلابس عويْنات مَيّ …
# ( الشاعر ابراهيم شحرور / لبنان )
