قصائد بالمحكية اللبنانية
للشاعر بشير الجواد
-×-×-×-×
-١-
بحبك بطبع البدو الرّحل
بحمل خيمتي وبمشي ورا عيونك
ورا ميّا ورا نخلة
وبجر نهداتي غنم
وبدبّحن
دقات قلبي جمال من كتر العطش
دعساتهن عم يرجفو
عم خاف
إنزت ع ضهرهن متل ما انزت
شلال من صخرة على صخرة
بحبك متل طبع البدو الرحل
بشد عمري حبال للخيمة
يهب الهوا وملِّع
وما تعود عيني تشوف
إلا سعف
إلا بلح متروك
والمي ل ببالي بقي
يشتي غرق
وانتي تمدي الفي
وإتعمشق بهالفي ت طالك
ويهدا الهوى ويبقى طلل مني
ويمرق شي شاعر من عصر ممحي
اطلال يكتبني
تطلع قصيدة لا وزن لا قافية
وانمحي متل اللي عالرمل إنكتب
وانت تضلي متل عالحور العتيق
-٢-
لا تكرّهي طعم الدمع للخد
لولا الدمع عينك
شو بوّسا ياكي!!
عن جد إياكي!!
ما في طفل نام بهنا هلقد
الا و فوقو في صدر باكي
و ع قد ما ضحكك انا حبيت
حبيت اكتر فلسفة دمعك
شفتك وجع متروك عالسكيت
زتيت ضحكي و جيت انوجعك
-٣-
شو بتشتغل ؟؟
تابوت ..
و الميتين كتار جواتي
و اول زبونات ضحكاتي
-من ايمتا؟؟
من وقت صارو الخوت
يحكو
و ينسو الناس عقلاتي
من وقت ما تعمّر مجد ل سكوت
ع رماد صوتي و جمر انّاتي
من وقت ميزان العدل ما صار
ختيار
محني
بس بدو يموت
و ما في عصايي تسند الختيار
و من قبلها؟؟
شو كنت؟
كنت جردة سيف
غنجة بنت
صهلة فرس من زفة الياقوت
غابة صنوبر
عرش عشتاروت
صدّق قبل هلأ ..
حتى كنت بيروت
للإستماع إلى باقة من قصائد الشاعر بشير الجواد الضغط على الفيديو في الصورة أدناه :
