طالع ع بالي إسألَك
من وين بيجيبو
الأزرق هالبحر؟!
وكيف بينام الشتي مع هالدني
ويخلق زهر؟!
وليش الجمال بهالمدا
ما بيسكبو غير الشعر؟!
طالع عبالي إسألك
شو السرّ
تا كل شي حلو
دربو وعر؟!
والشوك من عمر السنة
والورد من عمر الشهر!!
والظالم بخبزو الهنا
والطيّب بخبزو القهر!
…
طالع ع بالي كتير…ع بالي
وبيتك بعيد بعيد بالعالي
لا قدرت أوصلّك أنا
ولا قدرت تسمع صرختي
ووقع الحكي من غيمة خيالي
…
وقع الحكي
…
وجرفو النهر
# الشاعر زياد عقيقي / رئيس منتدى قناديل سهرانة / لبنان
