# ” باقيِة بيروت ”

طَفّوا البِكي

صار الدَّمع شحتارْ

شو صار يا بيروتْ

تَـ عَتَّموا لْ خبارْ

مين يللي

بيكرهِك هَـ القَدّْ

وشَعَّل لهيب لْ حِقدْ

ما عاد في عنَّا حَكي

ما عاد فينا نوثَق

ولا نشتِكي

ولَ مين بدنا نشتكِي؟!

حتّى الحقيقة ملَبَّكِة

عم تستحي ومشكِّكِة

معقول لِ وَلَّع بإيدو النَّارْ

يكون من صنف لْ بشَرْ؟؟؟!!

هيدا وحش قلبو حَجرْ

أسوَد مِتل غَيم انكسَرْ

خلَّا الشِتا ببيروتْ

دَمّْ ودَمع…

ودهشِة صراخا سكوتْ

آخ يا مدينة حلا

لا تسكني بتابوتْ

قومي اكتبي التّاريخْ

قولي الحقيقة السَّاطعة

قومي اصرَخي

سَمِّيهون وقوليهن إنتو:

إنتو لْ سرقتو فَرحتي

إنتو لْ حَرَقتو بَهجتي

إنتو القلب يلِّلي ارتَهَنْ

إنتو اللي بِعتو هالوطَنْ

إنتو اللعنِة بهالزَّمَنْ

قوليلهن رغم الكِره

رغم الحِقدْ

رح يفتَحوا لْ بيوتْ

وباقية بيروتْ

باقية بيروتْ!!

# الشاعرة والكاتبة رندة رفعت شرارة/ الحركة الإبداعية في كندا والعالم .