مين لْ ما عم يبكي على بيروت؟
بيروت بكِّت هالدني كلّا…
شلنا الضحايا من قلِب البيوت
و في ناس تحْت الردِم يا الله!!
ما بتخلص الإشيا بلا ما نموت؟!
ما كان فينا بالحكي نحلّا؟
ولّا الدني صارت متِل تابوت
و الناس عم تبرم على مْحلّا…
مع هيك رح نبقى بوِجّ النار
نحمل تَعَب و نقول ما تعبنا
يحطّو ببالْن كلمتين زغار
وحياة كل إمّ انقتَل إبنا
وحياة بكرا و شو تعذّبنا
بيروت رح ترجع تَ تاخد تار….
#( الشاعر ماهر يمّين/ إهدن / لبنان )
