لكل شهدا الحبر الأحمر…بعيدن …

قصيدة الشاعر زياد عقيقي ( في عيد المعلم )

-×-×-×-×-

ناموا كلّن
ناموا كلّن…
شبابيكن نعست بالليل..
طفّولا وفرشولا الليل
وناموا هالميل وهالميل
كلّن ناموا..
ناموا كلّن..
شو بعدك واعي ت تقلّن؟!
ت توعّيهن؟!
طفّي النطرا !!!
طفّي من راسك هالفكره
ضوّك مش رح يمحي الليل!!!

شو بعدك ناطر ؟
… شو ناطر؟!
شَردِت أحلامن لبعيد
فات عليهن إبن الشاطر
شعّل فيهن حلم جديد
وراحوا… وبعدُن
راحوا… راحوا
بهالليل الما بتهدا رياحو
شو بعدك ناطر يا ناطر؟!…
صاروا بعاد …
… وصرت بعيد…

إنت مبارح ..
صرت مبارح
وهنّي اليوم.. اليوم
… وبكرا
يا ملفلف حالك بالنطره
وعم بتدقّ جراس النوم:
” قوموا نكتب.. قوموا نقرا !!! “
حاجي تدقّ جراس النوم
.. جراس اللوم
جراس النطره!!!
أحلامن ما بتعرف تقرا!!!

ليشك حامل لون الأحمر؟
كلّ قلامن صارت زرقا
كل قلامن صارت زرقا
ت تغيّر هالمابيتغيّر؟!
…ضبّ قلامك
… ضبّ الورقه!!!
صارت زرقا .. كلّ قلامن
وبالأزرق كتبوا ع كمامن
.. ع الحيط .. الشبّاك.. الطبقه
كتبوا برّا زياح الورقه…
أزرق أزرق.. كلّو أزرق
كلّ اللي صار.. ورح يبقى
أزرق أزرق.. نومن أزرق
وبعدك بالأحمر .. عم تشقى
وعم تكتب جوّات الورقه!!!

سامع صوتك بعدو والع
فوق الإيّام المقهوره
حاج تزيّح بالطبشوره
تربّط بالإشيا المكسوره
توعّي الأحلام المهجوره
مش رح فيك تخبّي الواقع
شو بعدك والع … يا والع
ضوّك نازل .. عتمن طالع
إنت زغير .. وليلن واسع
.. وصوتك سرّب ع الأسطوره!!

رايح؟!
عم بتقفّل بابك؟!!!
طفّيت سراجك.. فلّيت؟
برد كتير بعتم غيابك
ضوّي !!!
حبر قلامك زيت!!
ضوّي حروفك!!
ضوّي كتابك..
ضوّي مطرح ما ضوّيت!!!
برد كتير بعتم غيابك
عم نتلفلف بالياريت
…
دقّ جراس النوم وعلّي
هزّ النوم .. ووعّي البيت!!!
بوادي الليل.. سراجك تلّه
سهرانه عا نوم الكلّ
وإيدك ..هيك.. تنسّم إيدك!!
إيدك تغمر نوم الكلّ
وتدفّي أحلام الكلّ
.. تسكبلن عيد من نبيدك
ت يعلّو بكاسك.. وبعيدك
ولو مهما النجمات تهلّ
وتعبّي بهالليل الواسع
… إنت الشمس …
الضوّ الطالع
من محلّ اللي بيقفوا ..تطلََّ!!!

الشاعر المعلم زياد عقيقي