” حريّة “

قصيدة بالمحكية للشاعر ورد العبد الله

-×-×-×-

حرّية

فجأة انْجَرَح بِالإيد جِرح كْبير
وْ دَمّو هَرب
مَبسوط عَم يِسأل عَ ضَوّ كْتير
مِتْل الوَلد … طالِع عَ بَرّيِة
وْ بَرّا الجِسِم
للدَّم …
حُرِّيِة …!

بَسّ الجِرِح بِالإيد مِش عاطول
لو ضَلّ مَفتوح الجِرِح
وِالدَّم عَم بيروح …
بْيِقْعُد مَحَلّو مَوت … مِش مَجروح
وِاللِي انْجَرَح … تَا يْعيش
لِازِم … بِسِرعَة … يِحبِسا للرّوح

شي خَيط … حتّى يْسَكِّرِ المزرِاب
مِتْل القِفِل … عَم يِزْربو … للبِاب

حَبْسِ بْحَبِس … وِ جْنون
حَفلِةْ … قُطَب
مَع دَمّ … عَم بيخون
وِالخَيط … بَسْ يِمشي عَجِرح الإيد
حُرّيتو …
صارِت … كأنّا … شي نِدِر ملعون

سَجِّان يا خَيْط القُطَب … مَسجون !