باقة من قصائد الشاعر زياد عقيقي*
( قصائد من المحكية اللبنانية )
-×-×-×-×-×-×
من يوم بلّشت العمر
عم بزرع بهالليل
كلمات…
بسقيهن حبر
وبزدلهن بالكيل
من يوم عينيك الخضر
حالي أنا؟!!!
يااا ويل!!!
لا عاد بالي بالقمر
يبّست كرمي بسيل
طفّيت ليلاتي الحمر
من يوم عينيك الخضر
صار الشعر…
كل الشعر
هالميل!!
-×-×-×-×-×-×-
صوتي جرس…
مقهور
من زْمان يبست طنّتو
وما نقّزا عصفور
صوتي جرس ..مكسور
بالعيد وقعت رنّتو
وهالأرض عم بتدور
وكل اللي سمعو عنّتو
عالعيد جابو زهور
والعيد ضاعت جنّتو
والناس عم بتدور…
والعيد عم بيدور ..
-×-×-×-×-×-
بيني وبينِك في هوا
وكل المسافه رماح
الجرح اللي بِ روحي استوى
الجلّاد عم يرتاح…
بيني وبينك…جلجلة
نصا إلك …
نصّا إلي
طالع ..
يا ريت بتنزلي
ت نضمّ جرحينا سوا
ونكمّل الزيّاح
-×-×-×-×-×-×-
إنت وأنا
بضفة نهر
وعم ترقصي …حافي
وقديش من حالو انقهر
(ياااا ميّتي …وقافي!!!)
إنتِ وأنا…
… النهر انتحر
وهبّ الهوا… دافي
وشو هرهرو وراق السجر
شو حنّ..صفصافك..
..ع صفصافي !!!
والليل..قدّاس الضجر…
فوتي..ولا تخافي
إنتِ وأنا.. ببيت الشعر
وعم تدلف القافي
وشبّاك هالوزن انكسر
ولِم لفِّك لحافي
بالليل… بخيام السهر
شو صرّخوا..ورقصوا الغجر
ما ضلّ بفراشو ..قمر
ولا ضلّ بينومو ..حجر
ولا ضلّ فينا ولا حدا…غافي
-×-×-×-×-×-×-
عم شمّسُن… (قصيدة عمرا 27سنة)
سمراءُ الليلِ الأحمرْ
إمرأةُ الليلِ الأسمرْ
تتثاءبُ خلفَ ستارِ العتمةِ
تدعوني
أُدخلْ في فرحِ الأحزانْ
لملِم دنياكَ من الطرقاتِ الورديّةِ
أشعلْ عينيكَ ..
لتبصرَ في عاصفةِ الليــــلِ
لتدخلَ في
… زمنِ العميــــانْ
* * *
ســمراءُ الليلِ الأحمـــرْ
تتلوّى في جسدِ امرأةٍ
في جسدِ امرأةٍ تتلوّى
… في جســـدٍ
…في امرأةٍ.. تُـــغوَى
أو تغوي الليلَ وتعصفُ بي !!
وتمزّقُ .. بي
سمراءُ الليلِ …
تمزّقُ بي !!!
وتسافرُ بي …
كي نعبرَ في
نفقِ الشهــــوَه !…
سمراءُ الليلِ الأحمرِ
.. لا تُروَى !!!
كـم تعرفُ كيفَ …
وتعرفُ كيـــفْ !!!
… كم تعرفُ كيفَ أنـــا أُروَى !!..
كم كم تتشرّدُ بين الليلِ … وصوتي
أرصفةُ النشـــوه !!!
سمـــراءُ الليلِ ..الليلِ … الليـــــلْ
ســـمراءُ الليــلِ … الليــــلِ
اللــــيــــــــــلْ !!!
سمــــــراءُ الليلِ الأحــــمرِ
…
كـــــم حُلـــوَه !!!…
* * *
زياد عقيقي
في 17-11-1995
-×-×-×-×-×-
كان الملح عالشط..عامل عيد
والموج جايي…
الموعد مبكّر
وإنت وع رمل الشط..
كم في إيد !
بالبحر عم تنمدّ…تا تسكر
نْزِلتِ البحر
وسمعت…شو تنهيد!!
الموجات عم بتشدّ فيك بعييييد
والعيد ناطر…
والملح…ناطر
والبحر عامل عيد
…للسكّر!!
-×-×-×-×-×-×-
زهقان…
دوزنت الوتر
والليل… عا حلّو
علّيت بغناني السهر
ولاد العتم ..طلّو
غنّو ورقصو تا هجر
نوم الدني مْحلّو
ولِم راح من قلبي الضجر
شلحت عليُن كمشة حجر
لمّو خيامُن هالغجر
فلّو
خيالِك وعي
..صرتِ معي
والشعر خاتم إصبعي
صبّيت
بيكاسي القمر
وسهرت…
ت شربت العتم كلّو
*( الشاعر زياد عقيقي رئيس منتدى قناديل سهرانة في لبنان )
