كتب رئيس منتدى قناديل سهرانة في لبنان الشاعر زياد عقيقي قصيدة مرحة وأرسلها لعقيلته لمناسبة كذبة أول نيسان ( ابريل ) وقال فيها :

كلن بيشوفوكِ مرا حلوة
ولطفك مواسم فايضه ..وسلال
وشعر وعينين وقدّ شو ميّال
وما بيعرفو واقع أنا ببلوة
وإنّك مرا ..وشخصيتك رجّال…
***

ما بيعرفوا إنّك حلا كذبه
وآخر حدا بيفوت عا قلبي
وما بيعرفوا إنّك حبس مقفول
وإنّو حياتي بقربك …الغربه
وإنّي بصمتي كنت قول وقول
وكل يوم عايش جلجلة صلبي
***

اليوم بدّي بحصتي بقّا
وإكسر القجّة …
وخلّص الأحزان
بدّي مرا …غيرِك…
فيا رقّه
بدّي مرا …ضحكة وفرح
ولوان…
بتستاهلي…
الخدعة ادفعي حقّا
كنتِ القصيدة…
اليوم…للنسيان
حدّك دقيقة بعد..ما ببقى
دوقي غيابي.. تذكّري اللي كان
وكل اللي قريوا كلمتي بدقة
يتذكّروا وتذكري إنتِ
كريتكن كلكن سوا عن جدّ
وحلو الكذب
بِأوّلو لنيسان ..

وختم قصيدته بالقول : ( بعتذر عالمزحتين: الكذبه + والطقطوقة الشعرية 🙂 .. مزحة بزمن الكورونا الأسود

# الشاعر زياد عقيقي / لبنان