مقاطع من قصيدة ” إلى معتقلة اسمها سناء ” للشاعر بلال شرارة :
شايف مرا يمكن سناء
بتمشي طريق الجلجلي
و شفت الشجر ماشي معا
الله لو امشي معا
إحمل معا همّ الزمن إللي انصلب
و شايف مرا بتمشي ع وجه المي
بِتفتح مدارس ع اليمين و ع الشمال
بِتزرع حواكير القرى بالقمح
و وجه الصبح
تخبي القمر بيعبها
و تشيل من عبا شمس
شايف مرا بِتمشي طريق الجلجلي
و اسمها فلسطين
بِتوصل على نهر الزمن
و تعمِّد الاطفال
تتعمشق كروم الجليل
و تطلع على الكرمل
و تدق ع بواب الخليل
بيطلع نبي و يستقبلا
و يذبحلها كبش الوقت
و تفوت ع الهيكل
تطرد التجار
و توصل ع آخر هالطريق
و تفوت ع بيت القدس
تصلي الصبح
و تحضر القداس
و يمشي وراها الناس
تحرق كروم السكت
و كروم الوهم
وتصرخ ببرية وطن
عاشت فلسطين
