..اختار موقع ” ميزان الزمان ” باقة من القصائد المحكية اللبنانية للشاعر أحمد عامر ..وهنا القصائد :

-1-

قالوا الدني دولاب

قلت منيح

ممكن شي ( يوماً ما )

تضحكلي

رَسْمِت ع وجّي

من الخرايط

زيح

وطبعت وجع مختوم

ع البكلة

الدنيي اللي دعست

بي قلب محروق

لِحقِتْ دمع هالقلب

عالدعسة

ن عنّت ع بالا ب يوم 

تطفي حروق

بتبوسني

و بيعلموا الخمسة

-2-

إسمِك مَرَق مرة

ع درب البال

و ياما أسامي طويت

ع إسمٍك

( بحبّك أنا )

بسّ قِلت ب العرزال

كان العقل مشغول

بِ جِسمِك

بَدّك تفلّي ؟

عال ،

فِلّي بْلا رجوع

ما عاد إحساسي

مَداكي ومسرحِك

لا تسكّري خلفك

شبابيك الضلوع

و قولي قبل

كرمال عبّي مطرحٍك

-3-

طَبّع ع جسمِك لون

خد الشمس

تزيّح ت صاروا مواج

ألوانو

مخربَط ع طول البعد

دوزانو

يغلي ع حالو يدوب

يهمس همس :

مين اللي قلّك شوف

من دوْن لمس؟

قَسِّم عليّي

و العب بيانو

-4-

بحبّك

ع مدّ جنون عينيي

وبعشق تفاصيلك

ع إيديي

وعم بحلمك

حدّي

    معي

        قبالي

أصعب قصيدة

بتجرح خيالي

إنّكْ لَ غيـري

وعايشي فيّي

-5-

بيصبر عليّي الشعر

كل الدهر

وعندي الوحي

شغّيل ب الأجرة

بتطلع معو شطحات

ع السكرة

بتبقى القصيدة

ناطرتني شهر

و بغنّجا

و بتحرز النطرة

# الشاعر اللبناني أحمد عامر #