-1-
انت ومعي…ما تخون
وبيسألوا:
هلقد فيي نام؟؟
ما بنام حتى ريّح جفوني
ولا بنام حتى قطّف الاحلام
وانطر شي فارس متل مجنوني
_عم نام حتى قطّع الايام_
ما بيعرفوا من يوم ما فليت
“بصندوق عينيي” الدمع ضبيت
وعم خاف لما فتّح عيوني
-2-
بتغيب ؟؟ فيك تغيب
شو يعني
بجارور حلمي تاركة ذكرى
عندي جرح بالقلب مانعني
افتح معك بوابة ل بكرا
ولو قال هالقلب اشتقت
بفلفش بذاكرة الوقت
عن ساعة ل كنا سوا
نلبس مراويل الهوى
ونرجع كأنو ولاد
واهرب معك ع بلاد…
ع بلاد ما فيها حدا
تحكي يجاوب هالصدى
بإسمي
وترسم ع حيطان المدى
يطلع معك جسمي
مزبوط مشتاقة انا احكيك
لكن عليي تمرد غروري
وهلق خلص ما تظن رح ابكيك
وانسى عذابي والحق شعوري
جمّعت لحظات الهنا
وصمدتن ببالي
وفْتحت سحاب الانا
تا فوت ع حالي
-3-
بضمك…
ببالي بيلعب السرساب
بلاقي ع جسمك
دَين منسية،
بكتبلك
بيتلبكو دَيي
عم يلمع بعينيك لون غياب
ما قدرت تمحيه
عينيي
عندك مرا …
لغمراتها مرهون
من البرد عا ايديك
بلمحها
لا مطرحي
بتحب هيي تكون..
ولا بحب اني
كون مطرحها
لا تخونني …
وممنوع غيري تخون
هيي ومعك..
ممنوع تجرحني
وانت ومعي
ممنوع تجرحها
ما عاد بدي
درب عطرك زور
ولا احترق
ع موقدة غِيري
قلبي سبقني..
وعالبعد مجبور
ضلك بذاكرة الوجع
محفور
ت ضل بعيون الوفا
كبيرة
-4-
بالحب شيطانة انا
ما بتقدر عليي
مبارح وقت حدي قعدت
ما لمست ايديي!!!
و لا بالدفا حسيت…
ايدي على عمر الزمن مديت
العب بعداد الوقت
ت يوقف شويي
بلكي عليي تحن..
ما حنيت
بلكي بغرامي تجن…
ما جنيت
متل ل كأني ما حدا…
ضبيت ايديي بهدا..
حتى القصيدة!
ما قدرت كفيت
-5-
وبيسألوا؟؟
كيف قدرت
فصل حلم
ع قياس عينيي
وكيف قدرت حط الشمس
ساعة بإيديي
ومعقول يلي بيسألو؟؟ …
متلك ما عندن بي يا بيي…
وبيسألوا؟؟
من وين الفساتين
ل عم بلبسن ت بين جديدة
وكيف عم طال السما
وعني السما بعيدة
طب كيف رح شوف العنى
وبيي للي شاريلي هَنا
بيدفع تمن ضحكي انا
شي الف تجعيدة
# ( الشاعرة فدَك شريٌم / لبنان )
