…اختار موقع ” ميزان الزمان ” باقة من قصائد الشاعر حسان الأشقر في الشعر الشعبي اللبناني ( منه الزجل والعتابا ) , وهنا القصائد :

حسان الاشقر

جرح الزَّمن ..

غُطّي بصدري إيدك وما تفزعي

شرايين قلبي بالأصابع قطِّعي

ما تشفقي عا لون عيني لِّ انجرح

فيي حزن عم يقتل سنين الفرح

إنسي النبض حتى النَّفس ما تسمعي

ولولا نزف جسمي أنا بتحمَّلو

جرح الزَّمن عم إقشعو ما أجملو

آهي ودمعي منِّك بيتأملو

تبقي إلي والنّار فيي تولِّعي

بدّي بعينك شوف نظرات الهوى

إنتي لقلبي وحدك تكوني الدوى

خلّي زماني ينتهي وعهدو انطوى

وحدك بروحي ما حدا بيبقى معي

-2-

من نمط “العتابا”في الشعر الشعبي كتب الشاعر حسان الأشقر  وقال :

شوحلوة بدنيتي العيشه بلاكم

قتلتو  الناس  بالكذب  و  بلاكم

عليكم   لبس مَ  بيلبق   بلا   كم

ذياب   مستَّره   بأحسن    ثياب

-3-

في حزيران عام 2019 كتب الشاعر قصيدة تحاكي واقعنا اللبناني اليوم , قال فيها :

خطَّيت اعترافي

يا موت اليوم خطَّيت اعترافي

بدمع العين بحروف اللطافة

بفن الشعر والكلمة النقية

بصوت الآه يرجف عا شفافي

بلدنا الكان أيامه غنيّه

طهر إبداع ممتع بالنظافة

كرم أخلاق واللقمة الهنيه

كرامة وعز مع حسن الضيافة

قلولي وين دولتنا العليّه

قلولي وين أقلام الصَّحافه

قلولي وين لعقول السَّويه

مابعرف ليش عم ننسى الثقافة

طمع لنفوس غالب عالبريّه

ماعدنا نشوف وينيي الرَّصافه

حياة الناس صارت مهتريّه

وجع وهموم ما في يوم صافي

تركنا العدل عينه مرتخيّه

مَ قادر إقشع الميزان غافي

من الحكّام عم ياخذ هديّه

ياإما صار محكوم بهيافه

حكمنا قوم عندن عنجهيّه

هموم الناس لا إلهم سخافه

علينا بيضحكو عن سوء نيّه

كأنه الجوع مسرح للطرافه

تعو تنقوم بالثورة القويّه

نهزّ الأرض ونقرِّب مسافه

مجد لبنان من الله عطيّه

انكتب بالدَّم مش كلمة وخرافه

تعو تنضلِّ ونواجه سويّه

مانترك حالنا بوضع انحرافي

إذا للبوم رح نرخي وطنا

ذياب الكون رح تاكل حملنا

وعلى لبنان يعطينا العوافي

-4-

..ومن الزجل الشعبي اللبناني كتب الشاعر الاشقر وقال :

مين البدّا تتحدّى وتعلّي سقوف

خلّيها تبيّن قدّا وخلّينا نشوف

لو كَنّا روحا حلوة وقدّا ميّاس

ولو حتى برمشا بتغوي عينين الناس

بكلمة قلبا رح الوي والوي الاحساس

رح تشعر هيي بحبي وتقلّي اوف