كتب يوسف رقة :

..من سنوات ونحن نواكب الأنشطة الثقافية , تعرفنا خلالها على عدد كبير من شعراء لبنان , منهم من استحق اللقب , ومنهم رفعنا الدعاء له ان يصير شاعرا في يوم من الأيام .

ماهر يمين , من الشباب الذين لم تسمح لنا الظروف ان نلتقي معه في أمسية او نشاط , كنا نعرف والده صديقي الشاعر الراحل جورج يمين , لم نتوقع ان يكون الإبن شاعرا , بل على مستوى عال من الشعرية في القصائد المحكية اللبنانية .

إحببنا اليوم , أن نقدم باقة من قصائده المنشورة على صفحته الفيسبوكية , لتشاركونا في التعرف على هذه الطاقة الكبيرة.

هنا بعض قصائد الشاعر , الشاعر , الشاعر : ماهر يمين :

بتمِدّ إيدك عَ السما بْلهفِه

بْتغرُف عمِر

بتحطّ روحَك عَ الورَق نتفِه

بْيِرشَح حِبِر..

وْلمّا البِكي يخلُط حبِر بالمَيّْ

بْيشبَع سِكِرْ

فوق الحَكي تحْت الصَلا بِشوَيّْ

بْيِخلَق شِعِر…

#ماهر_يمّين

-2-

ومضة :

حدود العمر تابوت

حدود الحكي لِ سْكوت

-3-

متْل اللي مارق ع الشجَر نَسمه

هيك الحلا منّي عمِ يقرِّب

باللّيل عم خونِك مع العَتمه

وِجّ الصبِح ع النوْم عم سرِّب

#ماهر_يمّين

-4-

حرَّمِت لحظه تِرجَعي

وِ وْعدت “حالي” ودِّعِك

كل ما عَ بالي بتطلَعي

“حالي” عَمِ بْخونو معِك..

#ماهر_يمّين

-5-

بْهاللّيل مدري بْشو كنِت سارح

فجأة وعِي بالي،

“فلَّيت” شجرة عيلتي مبارح

وطلعت ما بقرب أنا حالي!

#ماهر_يمّين

-6 –

بكبر أنا و جِرحي معي بيكبَر

صفّى العمر كلّو  بَلا نكهه

وِ حروب فوق حروب عم بخسَر

متل اللّي فاتح عَ الدني جبهه…

#ماهر_يمّين

-7-

فيّي حكي صوتو نشِف

عم بكتشِف،

عمري أنا

ما في فرَح تَ ينصرِف

وْ لا في مدى تَ ينسمَع

عمري أنا

نصّو وجَع نصّو قطَع…

#ماهر_يمّين

-8-

ليلِك صبِح

خلّا الجرِح دافي

ماشي على جْليد الوقِت حافي

ليلِك صبح

خلّا العتِم عريان

ناسي العمِر غفيان

نايم متِل شَعرِك على كتافي

يشحَد دفا لْحافي…

#ماهر_يمّين

-9-

ل بيّي الشاعر جورج يمّين اللي خسرتو و كان عمري ٣ سنين..

ما بعرفَك إلّا شعِر

منَّك حَدا

بحسَّك صدا

بشوفك حَكي بشوفك حبِر

بشوفك صوَر.. وِ بْجَمّعَك

وِ بقول هلّق بقشعَك… ما بقشعَك

وِ بكون حابب إسمعَك …ما بسمعَك

وِبضيّعَك،

وِ بْصير إبكي.. و شو السبب!؟

يمكنْ تعَب يمكنْ عَتَب

يمكن عَ بالي ودّعَك…

#ماهر_يمّين