كتبت الأعلامية والكاتبة كلود صوما :

أيها الطفل يسوع ، ما اعظمك!
نزلت في مغارة ، فملأتَ السماء والأرض من مجدك !
بميلادك نسجد أمامك كما سجد الرعاة والمجوس ملتمسين رحمتك ونِعمك ، انزع من قلوبنا كل كراهية وحقد وغضب وازرع السلام والمحبة والتسامح ، اجعل بيوتنا مغارةً تتهيأ لاستقبالك بفرحٍ عظيم !
من موقع “ميزان الزمان ” و في فقرة ” ورد الكلام ” تحوّلت القصائد والنصوص لتراتيل وصلوات نرفعها اليك لنتمنى للجميع أعيادًا مجيدة وعامًا سعيدًا يحمل السلام والطمانينة والمحبة .

الكاتبة والاعلامية كلود صوما امام شجرة الميلاد المجيد

الشاعر زياد عقيقي :

واقف قدّامك…يا طفل المغارة..وبيني وبينك حساب طويل…صرلك سنين بتجي وبتروح…وكلّ مرّة كنت إمرق من حدّ المغارة وما إقدر إتطلّع فيك…كنت خاف تعيّطلي بصوت شي طفل…و تفلت منّي عواطفي المحبوسة وإتخايل طفل بين إيديي …وما عود إقدر سرّب ع الواقع القاسي كتير…
كنت متزاعل أنا وايّاك..عتبان عليك…كتير عتبان…ليش مغارتك بكلّ بيت …مليانة فيك..وبزوّارك…ومغارة قلبي معتّمة ما بيسرّب عليا إلاّ البرد والحرمان؟! …
ليش غناني الملايكة وبهجة الفرح مزنّرة كل مغارات البيوت…ومغارتي ما فيا صوت طفل يوعّي بعمرنا الحياة؟!
كنت إهرب من العيد …إكذب ع حالي…عا رولا…عالناس…مثّل الفرح والضحكة…وكان قلبي عم يبكي…
كنت إكره روح عالقدّاس ت ما يقولولي الناس ذات الحكي:”نقشعلكن!!!” صارت هالكلمة متل طعنة سكّين لئيم…يااااه شو بتوجّع…
كنت عالميلاد شوف الأطفال عم تفرح…إفرحلن…وإبكيلي…
بالشوارع كانت تدق جراس وغناني وبهرجة وألوان…وبقلبي عواصف الألم عم تنفخ بناي العتمة لحنا الحزين…
بتِذكر يسوع؟! مرّة كتبتّلّك:
( مغارتي ..زيّنتْ
بكل شي في عندي لوان
مزود حلو..دفيان
أحلى من اللي كان
مطرح ما يوما..كنتْ
… مغارتي زيّنت
بمَجوس …وبرعيان
بديهن هدايا لوان
وبقرة وحمل وحصان
ونجمة ..وملاك
وشجرتي لوّنت
…
تا تعزف الألحان
والعيد يملا مغارتي…وقلبي
ما ضلّ إلاّ إنتْ!!! )

---

وبمرّة تاني كتبتلّك:

(عِتقِت بقلبي مغارتي…
وقلبي كمان…
ناطر شي طفل ينام…بين حْجارتي
غمّضت عينيّي..
لْمحِت نجمة حنان
وصوتَك سمعتو…
من ورا عتم الزّمان…
ورجعت تضوّي عالزمان …مغارتي)

يا طفل المغارة…
أنا اليوم راكع قدّامك…عينيّي بعينيك…عم إتأمّلك…كأنّك طفلي أنا…عم شوف غراسيا مطرحك…حاسس الزينة إلي…الرعيان إلي…المجوس إلي…الملايكة… النجمات…كلّ الفرح إلي…كلّن إلي…إلي أنا…ومش لحدا تاني…حاسس اليوم كأنّو الميلاد بيطلع من مغارتي…من بيتنا أنا ورولا…من صوت غراسيا وغنانيا..من لعبا اللي مفركشين البيت…من غنجا اللي معبّي الدني!!!
بتذكر شو كتبتلاّ؟!!!
(إنتِ وجايي عالدني
جيبي معك قوس القدح
مدّي صبيعك فرفطي
نجوم السما متل البلح..
إنت وجايي عالسما
مدّي صبيعك واحلشي
بشعرو لألّله اللي انبطح
ت يشوفك وقلبو الحلو
ت ينشرح..
إنتِ وجايي وشوشي
كل الملايك بالسما
حكيهن حكي ..حكيهن وما
يمّا اعطيُن
عنوان بيتك..وادعيُن
قوليلهن : كلّن يجوا
ولمّن يجوا ..توصّي فين
يا روح قلبي…واعطين
كلّ اللعب…
كلّ الغناني…والطرب
ووراق بيّك ..والقصايد والأدب …
ضحكات إمّك ..فرحتا
وعيد المخبّى بدمعتا…
كلّ شي إلِك..
لا تسألي
بيرخصلِك …ولولا غلي…
إنتِ وجايي ..استعجلي

بيتي شو ناطر ينتلي…
من ضحكتك..
وتشعلي
جراس الفرح
عيدك إلي
ولا كاس إلّا وينسكب!!!)

صدّقني يا يسوع…هالمرّة غير كلّ المرّات…تصالحت مع العيد…تصالحت مع الحياة…تصالحت مع البكرا اللي جايي…ونسيت مبارح اللي راح…
هالمرّة يا يسوع…العصافير معبّايين سقفنا القرميد بشي ألف صوت وصوت…ومدخنة موقدتنا عم تغزل رقصاتا عا وسع الفضا…
هالمرّة يا يسوع…رح إحملك بي إيديّي..وهدهدك وغنّيلك متل ما بغنّي لطفلتي…ورح غمّض عينيّي ع فرح شو كبير…قدّ الحلم وأكبر….
يا طفل المغارة…قولك بكون عم بالغ إذا قلتلّك: أنا أسعد إنسان بالدني؟!!!!

الشاعر زياد عقيقي

الشاعر مارون أبو شقرا :

هيك قالتلو :
—————-

يا رزقتي ، اللي زيّنت بطني!!!
عم يتهموني.. وفيك بتعلّى !!!
كلما بليلي تقوم تلبطني،
حسّ قلبي فاق يعبطني
وإسمع بإجرَك دندنِةْ ألله !!!

يا جار قلبي يا حلم، لا تخاف
من سقعِةْ الكلمات المْسِمِّه…
نجِّد أصابيعي تَ تدفا لحاف ،
وحتى ما يدقر كعبك النفناف،
فرفط شفافي قشّ يا إمي !!!

حطّك عَ صدري.. ترضع ..وعدُّن
كم رمش عندك .. تنقز.. تشدُّن ….
الحيّات برّا ، يْسَلْحبو تَ يعقَصوك ،
عَ مصر أهرب حافيه ، بدُّن
يا خبز عمري ، يولّعوني ويحرقوك …
دشّيك … لفّك بالقهر ، ما يعرفوك …
جدِّب إيديك ، ومطّن ومدّن،
حتى ما نوجع يومِةْ اللي بيصلبوك !!!

الشاعر مارون أبو شقرا

الكاتبة والاعلامية كلود أبو شقرا :

“من لم يكن الميلاد في قلبه فلن يجده تحت شجرة مزينة”، إنه سحر الميلاد الذي هو نور داخلي قبل أن يكون زينة وبهرجة خارجية…
الميلاد محطة تكاد تكون الوحيدة التي تذكرنا بأننا على الأرض من أجل شيء آخر غير أنفسنا، من أجل الحب، الذي لا يقتصر على يوم في السنة بل يتجدد مع كل فرح نابض بالعطاء…
غدًا تشرق الشمس بيوم جديد في سنة جديدة تحمل معها الدفء كل الدفء لمن فتح قلبه لملك السلام والرحمة، فلنردد مع الملائكة: المجد لله في الأعالي وعلى الارض السلام والرجاء صالح لبني البشر.
نسألك يا من صنعت بمولدك بداية حقيقية للحياة.. أن تنشر السلام على كل أرض أرهقتها الدماء والدموع، وفي كل نفس تنوء تحت قيود الكراهية والحقد والانتقام.
نسألك يا من ولدت في عالم مظلم وأشرقت عليه بنورك أن تضيء ظلمة القلوب والعقول لتتحرر من الأنانية المؤذية، وتمشي على درب الرحمة وتحمي الإنسانية وتحافظ على نعمة الحياة بدل قصفها بشتى أنواع أسلحة الدمار…
نسألك ونسألك ونسألك أن تمسك بيدنا لنخرج من وادي الدموع إلى أنوار النجوم التي تسطع تهليلا لمجيئك أيها المخلص الفادي…

الكاتبة والاعلامية كلود أبو شقرا

الشاعر سليمان طراد :

شَرقنا المَصلوب

مِن وَين بَدّك يا مَسيح الشرق
تبلّش تهِدّ الهَيكل وتِبني ؟!
ما شِفت حتّى بالخَطايا الفَرق
بيتقاتلو تا يقسَمّوا الجبنِه
…
حكّامنا بـ هالشرق بَدهن حَرق
ولولا كفَرِت… بالدين حاسِبني
للقتل والتهجير عِندن طُرق
وكل يوم عَ الشاشات يا ربّي
ما بشوف الّا ناس مِنغِبني
…
كِل عيد عَم مِنعَيّدو بالنار
وحكّامنا بيعَيّدو بـ ويسكي
والقتل والتهجير موضَه صار
ما بيعطفو عَ الدير! والحَسكِه..!!
بْدال الوَرد بـ كْفوفنا المِسمار
بـ زَلعومنا عم تِعلَق الحَسكه..!!
ومِن كِتر ما في بالشَرق كِفّار
شو قيمِة البَخور والمسكِه
وعَ دْيارنا كلما شي مجرم زار
بيشوف باب الهَيكل المِنهار
مَخلوع قِفلو… وضايعَه المَسكِه

سليمان طراد

الشاعر سليمان طراد

الشاعرة نجوى يوسف الشدياق :

ضوّا نور السما
وطلّ الزمان جديد
نجمة غريبة بالوما
مالت كأنا إيد
تمحي العتم
تضوي العمر وتزيد
تقلّن انا :
ضوّي ملان نبيد
فيي خلق الله
الله اللي كان بعيد
رشوا الحلم
ضوّوا الدني
زيدوا السما زغاريد
الليلة بمذود ملك
خلقان عنا العيد

الشاعرة
نجوى يوسف الشدياق

الشاعرة نجوى يوسف الشدياق

الكاتب والناقد د. أنطوان يزبك :

ميلاد يسوع يضعني كل سنة أمام سلسلة من التساؤلات والاشكاليات، الحنين إلى أيام الطفولة والشوق إلى الاحبة الذين رحلوا ،الطفل في المغارة ومئات آلاف الأطفال في العالم الذين يبيتون ليلتهم في البرد والحرمان ؛ الاهل الذين تشردوا بعيدا عن اسرهم وحرموا لذة العيد والسهرة في دفء البيت الذي يجمع الكل ؛ مع الأسف لا استطيع رؤية الميلاد الا من هذه الزاوية ولكن في نهاية الأمر أتمنى أن تمسح الدمعة من العيون وتجبر الخواطر. أما المسيح فأنا انتظر عودته بالمجد؛ عودته الفعلية ليدين الأحياء والأموات وليس طفلا صغيرا فلم يعد للطفولة من مكان مع الأسف في هذا الكون المتوحش !

أنطوان يزبك

الشاعر مارون الماحولي :

طعمة الجنّه

يا قشّ شو حسّيت خبرني
لمّا ضحك يسوع لإمّو
ولمّا نزل صوتا: يا تقبرني
يا قشّ شو حسّيت خبرني
لمّا شفت بيّو عم يشمّو
وما كان يعرف طعمة الجنه
حتّى مرق يسوع ع تمّو

امّ وطفل وتوحدّو الدقّات
ما روح روحا معلقه بروحو
ويمرق ببالا شويّة خيالات
صلبان… عجقة ناس… وجروحو
تغمِّض عيونا… وتمسك الدمعات
تقرِّب ع تختو تغنِّج الخشبات
بركي الخشب بيحنّ عا إبنا
لمّا سوا ع الموت بيروحو

تنخ السما من فوق محتاره
تودِّي تلج تا يعمل زياره
و قد ما مشي صارو تيابو مَيّ
والزرّ ورده والعراوي فيّ
ولمّا تعب واستصعب الرمشه
مدّ الجرد فرشي
وتتكمِّل بهالليل مشوارا
ودِّت برد فوق التلج يمشي
شاف السما عا باب المغاره

هَي قِصّة الراعي…. بِهاك الليل
ضَوّو بِقَلبو… مَريم ويسوع

الشاعر سمير خليفة :

إنقلاب أبيض عَ الورد !
رسالة حبّ لَ يسوع !!؟

يا حامِل عَ كتافَك دهشة المسمار وفرَح الصليب ! ما كنّا نشوف غير صليبَك ، صرنا نشوف صلبان وين ما كان ! صلبان من الخليج للخليج ! من البحر للبحر ! وتحت كلّ صليب في إمّ عم تبكي عَ إبْنا ، ومجدليّه عم تمسح بدموعْا إجرين الصليب ! كلّ المصلوبين بيشبهوك ! عيونن متل عيونَك ، قلوبن متل قلبَك ، كلّن إبريا متلَك ! نضاف متلَك !
أيّا صليب صليبك ؟ أيّا جلاد جلاّدَك ؟ أيّا مسمار مسمارَك ! كلّ الصلبان بتشبَه صليبك ! كلّ المصلوبين بيشبهوك ! كلّ الامّات الراكعين تحت الصليب وعمّ يبكو ع ولادن ،
بيشبهو إمّك ! كلّ المسامير بتشبه مساميرَك ! علّي جرحَك شويّ ت نشوفَك ! علّي صوتَك ت نعرفَك ! مبَلا بدّي صرّخ ! بدّي أوقَف بِ أعلى محكمه بالعالم ، وقول لَ يللّي بعدن لَ اليوم عم يحاكموك !!
هيدا يسوع وأنا بعرفو ! أنا واحد من تلاميزو ! يسوع بَري !؟ صلوبوني مطرَحو وتركوه !
مِتّ مصلوب ، الصليب خلّصَك من الموت ! لوّ مِتّ عَ باب الهيكل ، لوّ مِتّ عَ طريق أورشليم ، كانت خلصِت قصتّك من زمان ! لوّ جيت وقلتلّن مملكتي من هَ العالم ! ما كنت قِمت من الموت ! كنت مِتّ متل أيّا معتّر أيّا خاطي ، أيًا عابر طريق ! كنت بعدَك لَ اليوم بالقبر ! وما بقي منّك غير صليب مكسور وشويّة مسامير مصدّايه !
لوّ تعمل كتاب سياسي ، كانو عملو كتاب ضدّك !
لوّ تعمل حزب ، كانو عملو حزب ضدّك !
لوّ تعمل ملك ! كانو قامو عليك الملوك وزتّوك برّات قصرَك !
جيت ع الارض وعملِت يسوع !!
لوّ فيّي أعمل مخدّتي من الصخر يللّي كنت تسند راسَك عليّْ !
لوّ فيّي عمّر بيتي من حجار مسبحتَك !
علّمتْنا ع الحبّ وما عرفْنا نحبّك !
صرنا بلا شمس ، وبعدْنا منفزع عَ السما تنقص نجمه !
كنّا معلّقين ب الوطن ! صرنا نشتهي نتعلّق بْ جانِح طيّاره بسّ ت نشوف حالنا عمّ نعلى!
شلّحونا حرّيتنا وخلّونا نصدّق إنّو فينا نعيش بلا ما نتنفّس !
عايشين من قلّة الوطن ، مربوطين ب الارض ! عمّ نرفرف بِ التراب !
حمّلونا تزاكر ، ودلّونا ع البحر
صرنا بلا عمر !
ناطرين يبلّش عمرْنا !!!

من كتاب ملك ع بواب الفقَرا
الشاعر سمير خليفه

الشاعر جورج لطيف :

يا سامعين الصوت بليالي الخشوع
في ناس عريانين
ضلّوا تذَكّروا
وفي ناس جوعانين بهاك الربوع
وفي ناس متخومين وبيتمكروا
دخلك يا توما ؟ إنت من ذات الفروع!!
ليش النوايا يا صديقي تعكروا؟؟
ويوضاس خَيَّك خاف من بعدو يجوع؟؟
حتى. قيافا. بالمصاري سَكْروا
وبطرس طلوع الفجر قدام الجموع
قلبو قِسي وتنكروا وما تشكروا
ولبنان عندو ألف بطرس يا يسوع
لسيادتو وحرِّيتو بيتنكروا

الشاعر جرمانوس جرمانوس :

وَحدو التلجْ زينه ،
وْإنت جايي
وشْريطة البَرقَه مضوّايه
وْعَمْ يلمَعو رعيان لِحْكايه !

وْبيناتهُن إمَّكْ :
تفرك عيون القَشّ عَ كِمَّكْ
ويزَكْزِك العَتمه قَمَر تمَّكْ !

وْبينَكْ وبينُن ” يوسف النجّارْ ” :
شال الخَشَبْ من داير المنْشارْ
تا يْحطّ نَتّوفة حَطَبْ بالنارْ !

عَمْ يلمَعو رعيان لِحْكايه :
وْعَ باب لِمْغارَه ،
صابيعهُن عَ الباب بردايه
وِعيونهُنْ حارَه !
وْإنت شايفهُنْ مقابيلَكْ ،
وِبْتَعرفُن مينُنْ
تحت المخَدّه لْ عم تغنّيلَكْ :
حاطط أساميهُنْ !

عَم يلمَعو بالبال رعيان وْمجوسْ
شْبينُنْ تلج لبنان والنجمه عَروسْ !

من كتابات الأديب الراحل سليمان ابراهيم :

صلاة طفلة….ليلة الميلاد…….
يا طفل المغارة
بالرغم من برد كانون أضرٍم في قلب كلٍّ منا ،نار محبتك.
أعطٍ المحروم ما يعينه على مواجهة الحياة بصبر.
إرحم الخطأة فيعودوا عن غيّهم.
أطعم الجياع،ولا تدعهم ينحرفون عن طريق الحلال…
هبٍ المتألّمين صبراً على أوجاعهم،ولتكن أوجاعهم في سبيل الآخرة،فينعموا بمشاهدة وجهك البهي.
أفرِح الاطفال ورُدّ البريق الى عيونهم والبهجة الى أنفسهم،بعد الأيام العصيبة التي عاشوها زمن الحرب…
أيها الطفل السماوي،أعِن أهلنا على تأدية واجباتهم تجاهنا،في هذه الأيام الصعبة،التي تمرّ بها الانسانية جمعاء،فيخلّفوا وراءهم سعاة خيرٍ وقاصدي سلام،فنقف أمامك بترفُّع الانسان وتواضعه أمام عظمتك يوم تلقي على كواهلنا الحياة أعباء الاستمرار بما أردْتَ أنت مِمَّن على صورتك ومثالك القيام به.
وبذلك يا طفلاً بهيّاً،نكون عاملين أبداً على ميلادك بيننا وفينا،فلا تحرمنا يا ربّ من لذّة القدرة على التشبّه بك.
وحدك السميع المجيب.

الشاعرة أرليت غانم :

..إنك تكوني إم هيدي نعمة
إنك تكوني إم يسوع ..هيدي نعمة كبيرة
وإنك تكوني إمنا كلنا…هيدي بركة وقداسة
وإنك تكون بي …هيدي كمان نعمة
وتكون بي ليسوع هيدي إمتياز
وتكون بي العيلة وكل العيل…هيدي شفاعة
إنك تكون إبن مريم و يوسف ..وتخلق بمغارة.. وإنك تكون إبن الله.. وتعيش بتواضع..تسمع كلمتو و تطيعو حتى الموت…هيدي أكبر تضحية عرفها التاريخ
كلن قالوا “نعم” لألله
وكل “نعم” قدام الله بتكلف كتير
كل ميلاد ويسوع بقلوبكن ♥️

الكاتبة كلير بو منصور وهبة :

كبرنا و نسينا الملكوت العايش فينا …
العيد طفل ، فرح و براءة
الميلاد ، قلب و دفا
يسوع هوّ العيد الّي بِوعّي الطفل الغافي جوّاتنا
تنصير بهالدني مغارة حب و سلام
و شويّة ملكوت

الشاعر أنطوان شمعون :

دخلَك عَجِّل…

يا عيد اللي دربك صَعبِه
دخلَك عَجّل ما تِتأخَّر
زغار بلادي لِبسو الغِربِه
زُغرو تيابُن بدُّن أكبر
زغار بلادي بدُّن لعبِه
لِعبُن صاير نَطرَه بتِقهَر
يمكن مش قادر عالِّلعبه
لَنّو جِبلُن كِزبِه بعلبِه
كِزبِه زغيرِه بتِصدق أكتر…

جوع بلادي تعَلّا قْناطِر
تِمرُق تحتو الناس وتِفقَر
تِم بلادي إيدَك ناطِر
تِزرع سهلو قمح بيادر
تُغمر دِنيتنا عالداير
تصير الدِنيه … رغيف مدوَّر

الشاعرة والكاتبة ميشلين مبارك :

منشكرك يا رب على الميلاد المجيد وعلى ولادتنا التانية مع يسوع، لانو نحنا كنا همك الاول، وانت كنت البداية وقدام باب مغارتك بلشت كل البدايات.
بداية حبك اللامتناهي، والعالم كله عم ينطرك، كأنو عم ينطر حياة جديدة، ولادة جديدة فيك ومعك.
منشكرك يا رب ع نسيم الروح أمك مريم العذراء، لولاها عطر السما بقي بالسما. لانو ما كان شاف نسمة بكر فاضت من ذاتها. ملاّها من الروح، وحملها لأرضنا حتى صارت حياتنا إلها معنى.
الحقيقة يا يسوع، لمّا هبّت الريح وبدلت المطارح حطتنا بمطرح مش مطرحنا، رسمتنا صور مش لوجوهنا، كتبتنا حكايات بتوجع وشو في حكايات صداها مش مسموع، شو في أحزان من دون دموع، ومعك يا يسوع كل شي بيهون.
(ميشلين مبارك)

الكاتب والناشط الثقافي د. بول باسيل:

تَلبّدَت غُيُوم السَّمَاء
وارْتفعتْ حَرارَة الأرْض
رغْم بُرُودَة الفصْل وَتَزيّنَت شَوارِع العالم
وارْتفعتْ الأشْجار فِي السَّاحات
مُزَيّنَة بِأضْوَاء مُتَنوعَة ومخْتلفة
وانْتقلتْ مَغاوِر الأرْض مِن الجبَال إِلى أَماكِن تَأخُذ حَجْم الأمْكنة المخصَّصة لِمكوث مُخْلِّص العالم بِرمْزِيَّة الطِّفْل يَسُوع
لِيولد بِليْلة المجْد والنُّور بِقدَّاس إِلَهي فَتعُم التَّراتيل والتَّرانيم بِأصْوَات المؤْمنين
وُلِد اَلمسِيح هَللُويا هَللُويا . .
ومع هَذِه الذِّكْرى العالميَّة وَالتِي تَتَكرَّر كُلَّ سنة مِن شَهْر كَانُون الأوَّل
فينْتظرهَا اَلجمِيع كِبارًا وصغارًا بِانْتظار تَوزِيع الهدايَا والْحلويَّات مُتَمثلَة بِهَذا ألانْسان مُرْتدِيًا زيَّ بَابَا نُويل
وباللَّوْن الأحْمر مع كِيس مَرفُوع على الظَّهْر ومحمِّلا بِهدايَا العيد . . .
ويترافق مع المظْهر الخارجيِّ لِلْعيد الصَّلَاة والتَّقشُّف والاعْترافات وَتهيِئة الرُّوح والْجَسد
وَتجدِيد الإيمان لَدى الطَّوائف المسيحيَّة حسب التَّقْويم اَلغرْبِي
فَتدُق الأجْراس اِبْتهاجًا فِي مُنتَصَف لَيْل 24 كَانُون الأوَّل عِيد الميلاد اَلمجِيد
هذَا العيد اَلعظِيم ، وَهذِه المناسبة فِي مجْد وارْتقاء ،
وَبهَا نَرتَفِع بِالْفِكْر والْقَلْب ولفتْرة زَمَنيَّة ، صَلَوات تَتَجلَّى بِهَا وترنم . . .
افتحوا ابوابكم لاستقبال ملك المجد…

الكاتب الأديب د. جوزاف الجميل :

صاحبَ العيد، عد

ليلة العيد، أرسلتْ إليه برقية تقول فيها:
البرد مفترس. مشتاقة إليك. متی تعود؟
إنّها البرقيّة السابعة والسبعون. ولا جواب.
متی ينتهي عصر الجليد؟
الباب مقفل. والقلب مفتوح جرحُه الوعود والوعيد..
إنه عصر الإجهاضات التاريخيّة، . وراحيل غزّة والجنوبِ لن تجد العزاء، في عالم الصدی والصديد.
متی تظهر النجمة الفضّيّة، فوق مذود الشهيد؟
صاحب العيد، عد، كي ينتهي زمن النفاق والأنفاق والأمل الشهيد.
د. جوزاف ياغي الجميل

.

( ملاحظة : المشاركات نشرت بحسب ورودها الى الموقع بدون ترتيب للأحرف الأبجدية … ميلاد مجيد من أسرة ” ميزان الزمان ” الأدبي وكل عام وانتم بألف خير )