” قاضي الأحلام “
قصيدة بالمحكية اللبنانية للشاعر خضر حيدر
صاير أنا قاضي على الأحلام
كل حلم بيقاتل حلم
مش طالع بإيدي حكم
شو معقَّدة الأحكام!
قاضي أنا ومصلوب ع قوس القلق
والمحكمة مسكوب حبرا عالورق
صار المسا يمكن عشر جلسات
ما بتنتسى ردَّات خود وهات
وهيهات يحيا العدل حتى نام
شو بعمل بحالي أنا
والناس عرفو شو بنا
ياما حِكو وقالو
قالو اللي بيحبُّو الشِّعر:
هيدا الكلام المختصر
محظوظ نيَّالو
والمزمزو كاس النعس
قالو مع طلوع الشمس:
قاضي وشنق حالو
وفي مين ضحكو ولفلفو
حْرام المنام وزقَّفو
وقالو: حَرَام
بدْل البراءة للسهر
طلع الحكم إعدام !
الشاعر خضر حيدر
