العتب ع الذاكرة
للشاعر خضر حيدر
-×-×-×-×-
من يوم ما ضاع العمر
سكَّر ع حالو بواب
لا ضوّ عندو… لا شمع
من شهر، أو يمكن دهر
طفَّا الزمان وغاب
ولليوم بعدو ما رجع
شو كان ع بالو خطر
يزعل ويهجرنا
يا ما بعتنالو خبر
يرجع ويغمرنا
ويا ما صرخنا من الوجع
متل الكأنو ما سِمِع…
محتال يمكن هالعمر
مرَّة ع كتف خيالنا بينام
ومرَّة بيسبق خيلنا لقدَّام
بيوقع متل كمشة ورق
أو متل شي نيزك مرق
كلما برم تبرم دني
تلملم خيالو اللي وِقِع…
مجنون جايي عالسكت
يضرب أمانينا
ويقسّم وتار الوقت
ع رصيف ماضينا
أو يطرحا
أو يجرحا متل الدمع
بس العتب ع الذاكرة
غلطان بحساب الجمع !
الشاعر خضر حيدر
