حصل موقع ميزان الزمان على فيديو قصيدة ” صور ” كما القاها الشاعر حسن خلف اول مرة في أمسية لملتقى حبر أبيض في صالون الشاعر مردوك الشامي في بشامون في بداية العام 2020 ز
القصيدة كانت آخر قصيدة كتبها الشاعر حسن خلف خلال الاعام 2019 ’ وهنا نص القصيدة :
بتعرف شو يعني صور؟
يعني صبية عمرها عشرين…
صابيعها بالبحر صيّادين…
يعني مرا خلقت قبل حوا…
ومن قبل مشكل آدم المسكين…
صور… يعني الشعر من جوا…
وبرا السما ريشة وحبر تلوين…
ورب العرش حتى الدني ضوا…
غط الشمس بعيونها الحلوين…
بتعرف شو يعني صور؟
يعني سطيحة ماكلي ربع البحر…
عمّارها تا يمّد طوبارو نترَك…
ويمكن وقت ما صبها بجبلةْ سحر…
ما كان في تا يوقفو مخفر درك…
بتعرف شو يعني صور؟
يعني القلعة الخصرها
ممشوق يخزالعين…
من تحت منها في بحر
شِغلو يجي ويروح…
ويعزِق رمل مبحوح…
عا وَعِيْها نباع الحرف بالدّيْن…
هيي… وبنت سطرين…
صور يعني الإم يعني الروح…
وتاجر فنيقي مات من عصرين…
بعدو مَحلّو بسوقها مفتوح…
بتعرف شو يعني صور؟
رح خبرك عن صور هالقصة…
مرة الدهر فيها البحر وصّى…
ع شطوطها تسلل تا يسبيها…
مفكّر إلو فيها البحر حصة…
شافو جبل عامل مبكّيها…
لما بتدى من شرشفو يقّصا…
وكترِتْ ما شدّو تنينهن فيها…
لا ليوم صور الكون ناسيها…
علأرض نصّا… وبالبحر نصا…
( حسن خلف)
