” لاحق خيالي “

قصيدة للشاعر خضر حيدر

-×-×-×-

ذكَّرتها بحالي
ما تذكَّرِت…وتساءلِت
مين اللي جايي بـِ هالوقِت ع برجها العالي؟…
نِسْيِت هاك الغمزة العا خدَّا زهَّرِت
آهات فرِّت من شفافي صوبها
وتعربشِت بتوبها
وعيونها اللي تجمِّرت
من نار موَّالي…

دقَّيت ع بال الندم
ما لقيت عندا بال
وفتحت شبَّاك الحلم
تاري الحلم محتال
جايي لعندا يخطفا
متل الهمس قبل الشمس
سارح متل خيَّال
فجأة طلع خلقو النعس
ووعيت ع آخر نفس
ما لقيت خيَّالي
ما كان في غيري حدا
راكض لحالي بالمدى
عملاحق خيالي!