” كمشة غلط “

قصيدة بالمحكية للشاعر خضر حيدر

-×-×-×-×-×-

لا تفتحي الكتاب
خلُّي الحبر مرتاح
هالباب ما عمينفتح
من بعد ما السطر انجرح

وتغيَّر المفتاح…

كنتي متل لون الورق
محفوظ كرجة مَيّْ
صرتي متل شمس احترق
قلبا ع حضن الفيّْ
بتفكِّري بالمختصر
وبتكتبي بالمختصر
متل الأسى هزّْ الشجر

تا هرهر التفاح…

شو صار بواو العطف
هالجمَّعتنا غمار
هاك المعاني اللي انقصف
عمرا بشعلة نار
ما ضلّْ غير كمشة غلط ما بتنلقط
متل الشِعر طالع على كتاف القمر
من كتر ما علَّا سقط

مكسور ما لو جناح…

لا تفتحي الكتاب
ع قدّ ما قرينا قصص
حبرا خلص
طلع الورق كذَّاب
والسطر من بعد الجرح
عسكر بدون سلاح
سكَّر الباب … وراح !