” جانح العصفور ” قصيدة بالمحكية اللبنانية للشاعر الدكتور ابراهيم شحرور
-×-×-×-×-×-
الصيّاد قوّص جانح العصفور …
العصفور ضلّ يْطير … ما هَمّو
إمّو السّما … وْلو جانحو مكسور
رح يستعير جْناح من … إمّو ….
صابو بِمنقارو … وصار يْدور
حَوْلو … تَ يوقع لحن ويْلمّو
كف شكل بدّو يسكت العصفور
وْغنّيْتو بْ قلبو مشِ بْ تِمّو …
صابو بِ قلبو … الدمّ صار يْفور
وْوقت اللي من دمّو مسَح كِمّو
صار الفضا ملعب رفوف طيور
عبّو السّما…وْعا بعضُن الْتمّو …
وْمن يومها كلْما انْدبَح عصفور
صوب السّما بْيطلع ألف عصفور
من كلّ نقطة دمّ … من دمّو …
