“لا تسألي ما في حدا”

( قصيدة بالمحكية اللبنانية للشاعر خضر حيدر)

-×-×-×-×-×-

كلما حْكِيت بتسألي:
ليش الحكي سعرو غِلي
ما بينشرى بِ سكوت؟…

كلما حْكِيت بتخجلي
حتى ما فكِّر نظرتك كلَّا إلي
وهيِّي إلي
بس القلب مكبوت
بتكابري تا تنزلي
وما بتنزلي
متل الجبل عامل بطل
رافع جبينو للسما وعينو على بيروت

ضلِّي اخجلي
بكرا خدودك هالحمر
متل العمر رح يزهقو
ورح تزعلي
وما يصدِّقو
كلِّ اللي كانو يسرقو
نظرة غزل من عين هالبنُّوت

“لا تسألي ما في حدا”
ما في جواب ولا عتب
وسكوتك المتل الدهب
صاير خشب
شمَّر زنودو هالزمن تا يعملو تابوت !