(رشِّة فرَح) قصيدة بالمحكية اللبنانية

للشاعرة كلوديت عقيقي

-×-×-×-×-

عم تخلَص الايّام يا شمسِ اشْرِقي
جْمَعتلِّك مْنِ القلب شو مِنّو بِقي
وْما زال بعدو الليل والنجمه معو
رح ترجَعي شي يوم فيهن تِلتِقي

بعدو القمر سهران ما غفيو عِنينا
بعدو الحِلو غِيران عم يسأل عَلينا
بعدو القمر سكران
بعدو القمر حيران
داير حَوالينا

بعدو السَّهر عدروبنا بـْ يِحلى
بعدو صدا العجقات عامل عيد
وْبعدا الشَّمس بتفيقْ عا مهلا
تْوَعّي الفرح تـ يْقِلِّنا أهلا
وتزيد عا أفراحنا مْواعيد

رح ترجَع الضحكات
عمرو الفرح ما مات
بعدا سَواقي الخير
بتغنِّج الشمسات

بعدو “نسيم الشوق من عنّا مَمَرّو”
بعدو الحَبَق من فوق ورْقاتو ما هَرّو
رح نرجَع انْغَنّي
وْنرقص على الميلين
نستقبِل انْهَنّي
فرحه ع مدّ العين
نستقبِل انْهَنّي فرحه ع مدّ العين