أغنية قيد التلحين … لبيروت
بقلم الشاعر زياد عقيقي
***
لأ ما بيلبقلك الأسود
بيروت يا إم الدني
وكل الدني
إلها معك موعد
بيروت… يا جرح القدر
بيروت…يا قلب انكسر
بيروت كم حلم انتحر
لم حلمك استشهد
قومي البسي فستانك الأزرق
بيروت ..جايي هالبحر يسهر
جايي البحر من طلتك يسكر
جايي البحر … معجوق
شو بخبرو
وفيك الحلا مخنوق
شو بخبرو عن شطك المحروق
شو بخاف انو يضيع المفرق
قومي البسي فستانك الضحكات
تياب الدمع…ما بيلبقو للعيد
وانت العيد ببيتك السهرات
ونغمات ليلك سافرو لبعيد
بيروت فيك هالحلا تجلى
بيروت أجمل ما خلق الله
بيروت عم تبكي الدني كلا
قومي انفضي رمادك ع صبح جديد
