” غصّت دموعي “

قصيدة بالمحكية للشاعرة عايدة قزحيا

-×-×-×-×

غصّت دموعي
الشّمس بكيت
نور
وعلقت حروفي
بمهجة الأزمان
مدري وطنّا
للشّقا منذور
أو ربّنا من هالشّعب
زعلان

• * * * *
  ويا هالوطن
  مسكين شو
  يأسان
  غافي ع جمر
  النّار والأحزان
  من هالظّلم
  عايش ببطن
  الحوت
  متل ما عاش
  النّبي يونان
• * * * *
  حرام نتعمّد
  بزهد الجوع
  وخبزنا نعجن
  بملح الدّموع
  وحرام جنح
  الفقر يكسرنا
  والذّلّ يحني
  راسنا المرفوع
• * * * *
  أحرار نحنا
  بهالدّني ومين
  قال
  الحريّة حكي
  يمّا خُطَب تنقال
  صرخة رجوليّة
  الحرّيّة
  مش لعبة ولاد
  ومَرجَحَة ع
  حبال
• * * * *
  لبنان ع كتاف
  المجد خلقان
  مقلع بطولة
  منبت الفرسان
  بيفنى جمال
  الكون عاحدودك
  ومن بعدك
  بيتيتمو العربان
• * * * *
  حرام نهدر
  بالشّقا العمر
  الحلو
  وحرام ببلادي
  البشر يتبهدلو
  الدّولار عايش ع
  هواه ومستريح
  وتجّار كل مين
  بالغَرف إيدو إلو.