باقة بالشعر المحكي
مع الشاعرة السورية أمل فرج
-1-
صوتك متل ناي القصب مبحوح
وسمّيع خصري وعاللحن بيفيق
ما أعذبو لما الصدى بيروح
يرشح ع تمّي لهفتك عالريق
بحس بكياني جيت تاني روح
وبحب عالروحين جسمي يضيق
وتا تفل عنّي ما بقى مسموح
تا ضل حدّك عيش غنّي منيح
عَ جناح صوتك بعشق التحليق
-2-
شو بتشبه حقول الزهر
لما الصبح بكير
يزتك على وراق السحر
ومنها عبير تطير
وبصير شمك عالهدا
واسكر من خوابي المدى
وغيري عن ما رح يعرف حدا
انك معي سكّير
وعم حس ع شفافي خمر
مدلوق من كاس العمر
وتا عيش ع شفافك جمر
بدي ع اسمك صير
-3-
لو فيك تفتح طاقة الاسرار
تافوت اتنقوز ع اسرارك
واعرف شو عندك بالمسا سهار
ومين اللي بتشعل لهب نارك
ومين اللي ما بتحظر عليك زرار
ومين اللي عمتوحي لافكارك
ومن وحيها تنظملها الاشعار
وتسكن معك ببيوت اشعارك
وتسقيك من خمر القوافي جرار
وبحروف اسما معتق جرارك
تاروح هد العود و الاوتار
وقف اللحن بحنجرة صوتك
واعلن عليك الحرب بديارك
الشاعرة أمل فرج
